د تبليغ اوه دېرشمه ورځ

پرون غرمه زه او شېخ الحديث همداسې د باندې ووتلو ځکه په جومات کې دواړه لږ قید شوي وو نو په لاره کې یو خر په مخه راغئ چې هنګېدا.
شېخ الحديث ماته وايي ژر شه صديقه اعوذ باالله ووایه
ما وېل ولې څه ټکه را لوېدلې او څه مې کړي چې اعوذباالله راباندې وايې؟
ویل یې تا د خره هنګېدا وانه ورېده؟
ما وېل وا مې ورېده نو په دې کې د تعجب او حيرانتیا څه خبره ده؟
شېخ وېل خر ځکه و هنګېد ځکه چې شیطان یې وليد.
ما شاوخوا وکتل او ما وېل دلته خو ماته پرته ستا بل څوک په نظر نه راځي؟
وېل نه دا لعين شیطان موږ او تاسې ته ځان نه راښکاره کوي او شرميږي، یوازې پيغمبرانو او ځينې حيواناتو ته به یې ځان ور ښکاره کولو.
یو سات وروسته چې کله بېرته د جومات په طرف راتلو نو د یوه کور مخې ته یو ډېر ښکلی چرګ وو او اذانونه یې کول، شېخ وېل یا الله شکر او ته پر موږ خپل فضل او کرم وکړې.
ما وېل شېخ صیب ستا تبیت نن سم دی؟ بيخي نابلد کارونه کوې نن.
وېل ولې تا د چرګبانګي اذان وانه ورېد؟
ما وېل وا مې ورېد خو دا خو نه تر اوسه د لمانځه وخت دی چې اذان کوي او نه هم دا کوم ملا دی، او بل چرګان خو هر وخت اذانونه کوي نو په دې کې د حیرانتیا څه خبره ده؟
وېل صديقه ته نه پوهېږې، دې چرګ ملایکه وليده.
ما بیا شاوخوا وکتل او د کوره یو تک تور هندی را ووت ما وېل دا درته ملایکه ښکاري؟

وېل نه ملایکې یوازې حيواناتو ته ځان ور ښکاره کوي پرته له پیغمبرانو نور انسانان یې نشي ليدی او بیا یې دغه مبارک حديث شريف راته بیان کړ:

حَدَّثَنَا قُتَيْبَةُ، حَدَّثَنَا اللَّيْثُ، عَنْ جَعْفَرِ بْنِ رَبِيعَةَ، عَنِ الأَعْرَجِ، عَنْ أَبِي هُرَيْرَةَ ـ رضى الله عنه ـ أَنَّ النَّبِيَّ صلى الله عليه وسلم قَالَ « إِذَا سَمِعْتُمْ صِيَاحَ الدِّيَكَةِ فَاسْأَلُوا اللَّهَ مِنْ فَضْلِهِ، فَإِنَّهَا رَأَتْ مَلَكًا، وَإِذَا سَمِعْتُمْ نَهِيقَ الْحِمَارِ فَتَعَوَّذُوا بِاللَّهِ مِنَ الشَّيْطَانِ، فَإِنَّهُ رَأَى شَيْطَانًا »
ژباړه: له حضرت ابو هریره څخه روایت دی چې له رسول الله ﷺ فرمایلي: چې کله تاسې د چرګبانګي اذان واورېد نو د الله پاک د فضل او کرم وغواړئ ځکه چې (د دوی اذان څرګندوي چې) ملایکه یې ليدلې. او چې کله تاسې د خرو هنګېدا واورېده نو د شیطان څخه له خدایه پناه وغواړئ (د دوی هنګېدا څرګندوي چې) هغوی شیطان ليدلی.

• لومړی ماخذ: صحيح البخاري حديث ۳۳۰۳
• دویم ماخذ: صحيح البخاري ۵۹ کتاب ۱۱۱ حديث
• درېیم ماخذ: صحيح البخاري انګليسي ۴ ټوک ۵۴ کتاب ۵۲۲ حديث